Gudde Moien,
Merci fir d'Äntwert.
Vereinfacht heescht et, am Fong, datt et keng reell Statistike ginn zu dësen zwee Problemer. D'Realitéit ass awer nach ëmmer déi, datt Mobbing a Cybermobbing ee reelle Problem sinn an de Schoulen a Structures d'accueil an ech fannen et géif immens sënnvoll sinn, esou eng Statistik duerchzefeieren an de Schoulen, direkt bei de Schüler, fir eng Iddi ze hunn iwwert de reellen Ausmooss. An da brauch een natierlech och konkret Mesuren.
Ouni konkret Richtlinnen vum MEN, ass een Enseignant oft verluer a weess net wéi hien de Schüler kann hëllefen. An och wann eng Direktioun do ass fir engem weider ze hëllefen, hunn si dann och di néideg Outilen oder Autoritéit fir gerecht a sënnvoll ze handelen? Et kann och net sinn, datt bei extreme Fäll d'Léisung déi ass d'Kannt wat gemobbt gëtt an eng aner Schoul ze schécken. Leider ass awer dat keen Eenzelfall an et ass jo net schwéier ze verstoen, datt ee Kannt wat gemobbt gëtt an duerno och nach eng Schoul muss wiesselen immens Sequellen dovunner dréit.
Et geet och net duer, Programmer ronderëm dee Problem ze lancéieren, déi a Wierklechkeet keng reell Richtlinne fir d'Enseignanten an/oder Ënnerstëtzung fir D'Opferen ubidden. 'Visibility over substance' ass natierlech schéin no baussen, awer net de richtege Wee, a souwuel eis Kanner wéi och eis Enseignantë brauchen eng Politik, déi si heibäi ënnerstëtzt. Et ass essentiel, datt d'Moossname substantiell sinn an all Schoulakteur dobäi ënnerstëtzen dëse Problem an de Grëff ze kréien.