Elo wou mir erëm an déi kal Joreszäit kommen, an där Otemweeërinfektiounen traditionell zouhuelen, notamment duerch d’Gripp, de SARS-CoV-2 an de respiratoresche Synzytialvirus (VRS), stellt sech d’Fro vun der Präventioun an dem Schutz vun de besonnesch vulnerabele Persoune mat nach méi grousser Drénglechkeet.
De VRS ass eng wichteg Ursaach vu schwéieren Otemweeërinfektiounen, besonnesch bei klenge Kanner, eelere Persounen, Persoune mat chronesche Krankheeten an immunodréckte Persounen. Verschidde Vaccinen géint de VRS, dorënner Abrysvo®, Arexvy® a mResvia®, sinn op europäeschem Niveau zougelooss.
Verschidde Länner an Europa hu mëttlerweil eng staatlech finanziell Ënnerstëtzung fir dës Impfung agefouert.
An Däitschland gëtt d’VRS-Impfung zanter September 2024 vun de gesetzleche Krankekeese fir Persounen ab 75 Joer iwwerholl, souwéi fir Persounen tëscht 60 a 74 Joer, déi bestëmmte Risikofaktoren hunn. Am Juli 2025 gouf dës Iwwerhuele vun de Käschten op bestëmmte Persounen tëscht 18 a 59 Joer mat engem besonnesch héije Risiko ausgedeent.
Am Vereenegte Kinnekräich gëtt d’VRS-Impfung vum NHS gratis ugebueden fir schwanger Frae vun der 28. Schwangerschaftswoch un, souwéi fir Persounen ab 75 Joer. Eng Ausdehnung op d’Bewunner vu Fleege- a Betreiungsstrukture gouf och virgesinn.
A Frankräich gëtt den Impfstoff Abrysvo® zanter dem 31. August 2026 fir verschidde Gruppe vun eelere Persounen a Persoune mat Risikofaktore rembourséiert. D’Mamm-Impfung gëtt am Kader vun der Maternité integral iwwerholl.
Zu Lëtzebuerg huet de Conseil supérieur des maladies infectieuses (CSMI) schonn a sengem Avis vum 10. Dezember 2024 recommandéiert, d’VRS-Impfung individuell bei Persounen ab 75 Joer unzebidden, besonnesch bei Persounen, déi an enger Struktur fir eeler Persoune liewen, souwéi bei Persounen ab 65 Joer mat bestëmmte Begleederkrankungen, déi de Risiko fir e schwéiere Verlaf erhéijen.
Trotz dëser Recommandatioun an trotz der Entwécklung an aneren europäesche Länner ass d’Situatioun zu Lëtzebuerg, wat d’finanziell Iwwerhuele vun dëser Impfung ugeet, nach ëmmer net kloer.
An dësem Kontext hätt ech folgend Froe un d’Madamm Ministesch fir Gesondheet a sozial Sécherheet:
1. Gëtt d’VRS-Impfung aktuell vun der Caisse nationale de santé (CNS) ganz oder deelweis iwwerholl?
2. Falls aktuell keng Iwwerhuele vun de Käschte virgesinn ass: Aus wéi enge konkrete Grënn ass d’Regierung der Recommandatioun vum CSMI vum 10. Dezember 2024 nach net nogaangen, wat d’Impfung vun eelere Persounen a Persoune mat erhéijtem Risiko betrëfft?
3. Gouf zanter der Recommandatioun vum CSMI eng medezinesch, epidemiologesch oder ekonomesch Evaluatioun iwwer den Notzen an d’Käschte vun enger VRS-Impfung duerchgefouert? Wa jo, wéini, duerch wéi eng Instanz a mat wéi enge Resultater?
4. Huet d’Madamm Ministesch wëlles, eng finanziell Iwwerhuele vun der VRS-Impfung zu Lëtzebuerg anzeféieren, a wa jo, nach virun oder am Laf vun der nächster Saison vun den Otemweeërinfektiounen? Wa jo, no wéi engem Zäitplang a fir wéi eng Kategorie vu Persounen?
5. Falls keng allgemeng Iwwerhuele geplangt ass: Ass d’Regierung op d’mannst bereet, eng cibléiert Iwwerhuele fir déi Persounen anzeféieren, déi vum CSMI als Persoune mat engem erhéijte Risiko fir e schwéiere VRS-Verlaf identifizéiert goufen?
6. Falls net: Wat sinn déi konkret medezinesch, wëssenschaftlech oder finanziell Grënn, déi erklären, firwat d’VRS-Impfung zu Lëtzebuerg nach ëmmer net iwwerholl gëtt, obwuel de CSMI d’Impfung vu bestëmmte Risikogruppen recommandéiert an aner europäesch Länner dës Impfung schonn ëffentlech finanzéieren?
7. Ass d’Regierung der Meenung, datt déi aktuell Situatioun zu Lëtzebuerg, elo wou mir an déi nei Saison vun den Otemweeërinfektiounen erakommen, zefriddestellend ass am Verglach mat aneren europäesche Länner? Falls net, wéi eng konkret Mesure wëll d’Regierung huelen a bis wéini?